ಮಂಗಳೂರು–ರಾಸ್ ಅಲ್ ಖೈಮಾ ನಡುವೆ ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ನೇರ ವಿಮಾನ ಸೇವೆ ಆರಂಭ
ಕೋಸ್ಟಲ್ ಟಾಕ್ ನ್ಯೂಸ್ | ಮಂಗಳೂರು
ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ಮಂಗಳೂರು ಮತ್ತು ಯುನೈಟೆಡ್ ಅರಬ್ ಎಮಿರೇಟ್ಸ್‌ನ (ಯುಎಇ) ರಾಸ್ ಅಲ್ ಖೈಮಾ ನಡುವೆ ನೇರ ವಿಮಾನ ಸೇವೆಯನ್ನು ಸೋಮವಾರ ಆರಂಭಿಸಿದೆ.
ಇದರಿಂದ ಮಂಗಳೂರಿನಿಂದ ಸಂಪರ್ಕ ಹೊಂದಿರುವ ಅಂತರರಾಷ್ಟ್ರೀಯ ತಾಣಗಳ ಪಟ್ಟಿಗೆ ಮತ್ತೊಂದು ನಗರ ಸೇರ್ಪಡೆಯಾಗಿದೆ.
2026ರ ಚಳಿಗಾಲದ ವಿಮಾನ ವೇಳಾಪಟ್ಟಿಯ ಎರಡನೇ ದಿನ ಈ ಸೇವೆ ಆರಂಭಗೊಂಡಿದೆ. ಯುಎಇಯ ಪ್ರಮುಖ ಕೈಗಾರಿಕಾ ಹಾಗೂ ಬಂದರು ನಗರವಾಗಿರುವ ರಾಸ್ ಅಲ್ ಖೈಮಾ ಇದೀಗ ಮಂಗಳೂರಿನ ಅಂತರರಾಷ್ಟ್ರೀಯ ವಿಮಾನ ಸಂಪರ್ಕ ಜಾಲದ ಹೊಸ ತಾಣವಾಗಿದೆ.
ಆರಂಭಿಕ ಹೊರಹೋಗುವ IX 871 ವಿಮಾನವು 146 ಪ್ರಯಾಣಿಕರೊಂದಿಗೆ ರಾಸ್ ಅಲ್ ಖೈಮಾಕ್ಕೆ ತೆರಳಿತು. ಅಲ್ಲಿಂದ ಮಂಗಳೂರಿಗೆ ಬಂದ IX 872 ವಿಮಾನದಲ್ಲಿ 36 ಪ್ರಯಾಣಿಕರಿದ್ದರು.
ಚಳಿಗಾಲದ ವೇಳಾಪಟ್ಟಿಯಲ್ಲಿ ಮಂಗಳೂರು ವಿಮಾನ ನಿಲ್ದಾಣದಿಂದ ವಾರಕ್ಕೆ 58 ಅಂತರರಾಷ್ಟ್ರೀಯ ವಿಮಾನಗಳು ಕಾರ್ಯಾಚರಿಸಲಿವೆ. ಇವುಗಳಲ್ಲಿ 38 ವಿಮಾನಗಳು ಯುಎಇಯ ದುಬೈಗೆ 20, ಅಬುಧಾಬಿಗೆ 16 ಹಾಗೂ ರಾಸ್ ಅಲ್ ಖೈಮಾಕ್ಕೆ ಎರಡು ವಿಮಾನಗಳಾಗಿವೆ. ಉಳಿದ ವಿಮಾನಗಳು ಮಧ್ಯಪ್ರಾಚ್ಯದ ಇತರ ಪ್ರಮುಖ ತಾಣಗಳಿಗೆ ಸಂಚರಿಸಲಿವೆ.
ಮಂಗಳೂರು–ರಾಸ್ ಅಲ್ ಖೈಮಾ ನಡುವೆ ಪ್ರತಿ ಸೋಮವಾರ ಮತ್ತು ಶನಿವಾರ ವಿಮಾನ ಸೇವೆ ಇರಲಿದೆ. IX 871 ವಿಮಾನ ಬೆಳಿಗ್ಗೆ 9.30ಕ್ಕೆ ಮಂಗಳೂರಿನಿಂದ ಹೊರಡಲಿದ್ದು, IX 872 ವಿಮಾನ ಸಂಜೆ 6.25ಕ್ಕೆ ರಾಸ್ ಅಲ್ ಖೈಮಾದಿಂದ ಮಂಗಳೂರಿಗೆ ಆಗಮಿಸಲಿದೆ.
ರಾಸ್ ಅಲ್ ಖೈಮಾದಿಂದ ಶಾರ್ಜಾ ಮತ್ತು ದುಬೈಗೆ ಸುಮಾರು ಒಂದು ಗಂಟೆಯ ರಸ್ತೆ ಪ್ರಯಾಣದ ಅಂತರವಿರುವುದರಿಂದ, ಯುಎಇಗೆ ಪ್ರಯಾಣಿಸುವ ಅನಿವಾಸಿ ಭಾರತೀಯರಿಗೆ ಈ ಸೇವೆ ಅನುಕೂಲವಾಗಲಿದೆ.
