ಕೋಸ್ಟಲ್ ಟಾಕ್ ನ್ಯೂಸ್ | ಉಡುಪಿ
ಬೆಂಗಳೂರು–ಕಾರವಾರ ನಡುವಿನ ರೈಲುಗಳು ಮಂಗಳೂರನ್ನು “ಬೈಪಾಸ್”ಮಾಡುತ್ತಿವೆ ಎಂಬ ರೀತಿಯಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ತಪ್ಪು ಮಾಹಿತಿ ಹರಡಲಾಗುತ್ತಿದೆ. ರೈಲುಗಳು ಮಂಗಳೂರು ನಗರದ ಪ್ರಮುಖ ರೈಲು ಮಾರ್ಗದಲ್ಲೇ ಸಂಚರಿಸುತ್ತಿದ್ದರೂ, ಪ್ರತಿಯೊಂದು ರೈಲೂ ಕಡ್ಡಾಯವಾಗಿ ಮಂಗಳೂರು ಸೆಂಟ್ರಲ್ ಅಥವಾ ಮಂಗಳೂರು ಜಂಕ್ಷನ್ ಪ್ರವೇಶಿಸಬೇಕು ಎಂಬ ತಪ್ಪು ಅಭಿಪ್ರಾಯವನ್ನು ಮೂಡಿಸುವ ಪ್ರಯತ್ನ ನಡೆಯುತ್ತಿದೆ ಎಂದು ಕುಂದಾಪುರ ರೈಲ್ವೆ ಅಸೋಸಿಯೇಷನ್ ಅಧ್ಯಕ್ಷ ಹಾಗೂ ಕೊಂಕಣ ರೈಲ್ವೆ ಯೂಸರ್ಸ್ ಕನ್ಸಲ್ಟೇಟಿವ್ ಕಮಿಟಿ (KRUCC) ಸದಸ್ಯ ಗಣೇಶ್ ಪುತ್ರನ್ ಆರೋಪಿಸಿದ್ದಾರೆ.
ಪ್ರಕಟಣೆಯಲ್ಲಿ ಅವರು, “ಮಂಗಳೂರು ಎಂದರೆ ಕೇವಲ ಮಂಗಳೂರು ಸೆಂಟ್ರಲ್ ಅಥವಾ ಮಂಗಳೂರು ಜಂಕ್ಷನ್ ಅಲ್ಲ. ಕರಾವಳಿ ಕರ್ನಾಟಕವೂ ಈ ಎರಡು ನಿಲ್ದಾಣಗಳಿಗೆ ಸೀಮಿತವಾಗಿಲ್ಲ. ಮಂಗಳೂರಿನಿಂದ ಕಾರವಾರದವರೆಗೆ ಸುಮಾರು 300 ಕಿ.ಮೀ. ವ್ಯಾಪ್ತಿಯ ವಿಶಾಲ ಕರಾವಳಿ ಪ್ರದೇಶವಿದ್ದು, ಪ್ರಮುಖ ಪಟ್ಟಣಗಳು, ಶಿಕ್ಷಣ ಸಂಸ್ಥೆಗಳು, ಕೈಗಾರಿಕಾ ಕೇಂದ್ರಗಳು, ಪ್ರವಾಸಿ ತಾಣಗಳು ಹಾಗೂ ದೊಡ್ಡ ಪ್ರಮಾಣದ ಪ್ರಯಾಣಿಕರ ಬೇಡಿಕೆಯನ್ನು ಹೊಂದಿದೆ,” ಎಂದು ತಿಳಿಸಿದ್ದಾರೆ.
ಮಂಗಳೂರು ನಗರ ವ್ಯಾಪ್ತಿಯಲ್ಲೇ ಬಂಟ್ವಾಳ, ಪ್ರಸ್ತಾವಿತ ಫರಂಗಿಪೇಟೆ, ಪಡೀಲ್ (ಕ್ಯಾಬಿನ್), ಜೋಕಟ್ಟೆ ಹಾಗೂ ಸುರತ್ಕಲ್/ಮಂಗಳೂರು ನಾರ್ತ್ ಸೇರಿದಂತೆ ಹಲವು ರೈಲು ನಿಲ್ದಾಣಗಳಿವೆ. ಈ ನಿಲ್ದಾಣಗಳಿಂದ ಮಂಗಳೂರಿನ ವಿವಿಧ ಭಾಗಗಳಿಗೆ ತಲುಪಲು ಸೆಂಟ್ರಲ್‌ನಲ್ಲಿ ಇಳಿಯುವುದಕ್ಕಿಂತ ಹೆಚ್ಚುವರಿಯಾಗಿ ಸುಮಾರು 15 ನಿಮಿಷಗಳ ಪ್ರಯಾಣ ಸಾಕಾಗುತ್ತದೆ ಎಂದು ಅವರು ಹೇಳಿದ್ದಾರೆ.
ಬೆಂಗಳೂರು ಕಡೆಯಿಂದ ಮಂಗಳೂರಿಗೆ ಬರುವ ಪ್ರಯಾಣಿಕರು ಬಂಟ್ವಾಳದಲ್ಲಿ ಇಳಿದರೆ ಸುಮಾರು 20 ನಿಮಿಷಗಳಲ್ಲಿ ಮಂಗಳೂರು ಸೆಂಟ್ರಲ್ ತಲುಪಬಹುದು. ಆದರೆ ರೈಲು ಬಂಟ್ವಾಳದಿಂದ ಮಂಗಳೂರು ಸೆಂಟ್ರಲ್ ನಿಲ್ದಾಣದವರೆಗೆ ಸಂಚರಿಸಲು ಸುಮಾರು ಒಂದು ಗಂಟೆ ತೆಗೆದುಕೊಳ್ಳುತ್ತದೆ. ಅದರಲ್ಲೂ ಉಡುಪಿ–ಕಾರವಾರದ ಪ್ರಯಾಣಿಕರು ವಾಪಸ್ ಪ್ರಯಾಣಿಸುವಾಗ ಲೋಕೋಮೋಟಿವ್ ಬದಲಾವಣೆ, ಸಿಗ್ನಲ್ ಕ್ಲಿಯರೆನ್ಸ್ ಮತ್ತು ಪ್ಲಾಟ್‌ಫಾರ್ಮ್ ಲಭ್ಯತೆ ಸೇರಿದಂತೆ ವಿವಿಧ ಕಾರಣಗಳಿಂದ 2 ರಿಂದ 3 ಗಂಟೆಗಳ ಹೆಚ್ಚುವರಿ ಸಮಯ ಕಳೆಯಬೇಕಾಗುತ್ತದೆ ಎಂದು ಅವರು ತಿಳಿಸಿದ್ದಾರೆ.
ಮಂಗಳೂರಿನ ರೈಲ್ವೆ ಸಂಘಟನೆಗಳು ಮಂಗಳೂರಿಗೆ ಹೊಸ ರೈಲುಗಳು ಹಾಗೂ ಸೇವೆಗಳನ್ನು ಬೇಡಿಕೆ ಇಡುವ ಹಕ್ಕು ಹೊಂದಿವೆ. ಆದರೆ ಕರಾವಳಿ ಕರ್ನಾಟಕದ ಇತರ ಭಾಗಗಳ ಪ್ರಯಾಣಿಕರ ಅಗತ್ಯಗಳನ್ನು ಎರಡನೇ ಸ್ಥಾನಕ್ಕೆ ತಳ್ಳುವ ರೀತಿಯಲ್ಲಿ, ಪ್ರತಿಯೊಂದು ಫೆಸ್ಟಿವಲ್ ಸ್ಪೆಷಲ್, ವಂದೇ ಭಾರತ್ ಅಥವಾ ಇತರ ರೈಲುಗಳು ಮೊದಲು ಮಂಗಳೂರು ಸೆಂಟ್ರಲ್ ಅಥವಾ ಮಂಗಳೂರು ಜಂಕ್ಷನ್‌ಗೆ ಪ್ರವೇಶಿಸಲೇಬೇಕು ಎಂದು ಒತ್ತಾಯಿಸುವುದು ಸೂಕ್ತವಲ್ಲ ಎಂದು ಗಣೇಶ್ ಪುತ್ರನ್ ಹೇಳಿದ್ದಾರೆ.
ಬಂಟ್ವಾಳ–ಜೋಕಟ್ಟೆ–ಸುರತ್ಕಲ್ ನೇರ ಮಾರ್ಗದಲ್ಲಿ ಸಂಚರಿಸುವ ಫೆಸ್ಟಿವಲ್ ಸ್ಪೆಷಲ್ ರೈಲಿಗೂ ಸುಮಾರು 18 ಗಂಟೆಗಳ ಪ್ರಯಾಣ ಬೇಕಾಗುತ್ತದೆ. ಇಂತಹ ಸಂದರ್ಭದಲ್ಲಿ ಮಂಗಳೂರು ನಗರದಲ್ಲಿರುವ ಪ್ರತಿಯೊಂದು ನಿಲ್ದಾಣಕ್ಕೂ ರೈಲನ್ನು ಕರೆದೊಯ್ಯುವುದು ಪ್ರಾಯೋಗಿಕವಲ್ಲ. ಉಡುಪಿ, ಕುಂದಾಪುರ ಅಥವಾ ಕಾರವಾರಕ್ಕೆ ತೆರಳುವ ರೈಲುಗಳನ್ನು ಮಂಗಳೂರು ಜಂಕ್ಷನ್ ಅಥವಾ ಸೆಂಟ್ರಲ್‌ಗೆ ತಿರುಗಿಸಿದರೆ, ಲೋಕೋಮೋಟಿವ್ ಬದಲಾವಣೆ, ಸಿಗ್ನಲಿಂಗ್, ಪ್ಲಾಟ್‌ಫಾರ್ಮ್ ಲಭ್ಯತೆ ಹಾಗೂ ಕೊಂಕಣ ರೈಲ್ವೆಯ ಏಕಪಥದಲ್ಲಿ ರೈಲಿನ ಮುಂದಿನ ಸಂಚಾರ ಸೇರಿದಂತೆ ಹಲವು ಕಾರಣಗಳಿಂದ 2ರಿಂದ 3 ಗಂಟೆಗಳ ಸಮಯ ವ್ಯರ್ಥವಾಗಬಹುದು ಎಂದು ಅವರು ವಿವರಿಸಿದ್ದಾರೆ.
ಸುಮಾರು 300 ಕಿ.ಮೀ. ದೂರದ ಗಮ್ಯಸ್ಥಾನ ಹೊಂದಿರುವ ರೈಲನ್ನು ಒಂದೇ ನಗರದೊಳಗೆ ಮುಂದೆ-ಹಿಂದೆ ಸಂಚರಿಸಲು ಹಲವು ಗಂಟೆ ವ್ಯಯಿಸುವುದು ಆಧುನಿಕ ರೈಲ್ವೆ ವ್ಯವಸ್ಥೆಯ ದೃಷ್ಟಿಯಿಂದ ಸಮರ್ಥನೀಯವಲ್ಲ. ಪ್ರತಿಯೊಂದು ದೂರದ ರೈಲೂ ಮಂಗಳೂರು ಜಂಕ್ಷನ್ ಮತ್ತು ಸೆಂಟ್ರಲ್‌ಗೆ ಪ್ರವೇಶಿಸಬೇಕೆಂಬ ಒತ್ತಾಯದ ಬದಲು, ಫರಂಗಿಪೇಟೆ, ಪಡೀಲ್ ಹಾಗೂ ಜೋಕಟ್ಟೆಯಂತಹ ಮುಖ್ಯ ಮಾರ್ಗದಲ್ಲಿರುವ ನಿಲ್ದಾಣಗಳನ್ನು ಅಭಿವೃದ್ಧಿಪಡಿಸಿ, ಮಂಗಳೂರಿಗೆ ಉತ್ತಮ ಸಂಪರ್ಕ ಕಲ್ಪಿಸುವುದರ ಜೊತೆಗೆ ಇಡೀ ಕರಾವಳಿ ಭಾಗದ ಪ್ರಯಾಣಿಕರಿಗೂ ಅನುಕೂಲ ಕಲ್ಪಿಸುವತ್ತ ಗಮನಹರಿಸಬೇಕು ಎಂದು ಅವರು ಹೇಳಿದ್ದಾರೆ.
ಉತ್ತರ ಕನ್ನಡ ರೈಲ್ವೆ ಸೇವಾ ಸಮಿತಿ ಕಾರ್ಯದರ್ಶಿ ರಾಜೀವ್ ಗಾಂವ್ಕರ್ ಕೂಡ ಇದೇ ಅಭಿಪ್ರಾಯ ವ್ಯಕ್ತಪಡಿಸಿದ್ದು, ಕರಾವಳಿ ಕರ್ನಾಟಕದ ರೈಲ್ವೆ ಜಾಲದ ಕಾರ್ಯಾಚರಣಾ ದಕ್ಷತೆ ಮತ್ತು ಸಂಪರ್ಕವನ್ನು ಸುಧಾರಿಸುವ ನಿಟ್ಟಿನಲ್ಲಿ ಮಂಗಳೂರು ರೈಲ್ವೆ ವ್ಯಾಪ್ತಿಯನ್ನು ನೈಋತ್ಯ ರೈಲ್ವೆಯೊಂದಿಗೆ ವಿಲೀನಗೊಳಿಸಲಾಗಿದೆ ಎಂದು ಹೇಳಿದ್ದಾರೆ. ಪ್ರತಿಯೊಂದು ರೈಲಿಗೂ ಮಂಗಳೂರು ಜಂಕ್ಷನ್ ಮತ್ತು ಸೆಂಟ್ರಲ್ ಕಡ್ಡಾಯ ನಿಲ್ದಾಣಗಳಾಗಬೇಕು ಎಂದು ಇದನ್ನು ಅರ್ಥೈಸಬಾರದು. ರೈಲಿನ ಗಮ್ಯಸ್ಥಾನ ಹಾಗೂ ಉಡುಪಿ, ಕುಂದಾಪುರ, ಕಾರವಾರ ಸೇರಿದಂತೆ ಕರಾವಳಿ ಕರ್ನಾಟಕದ ಸಾವಿರಾರು ಪ್ರಯಾಣಿಕರ ಅಗತ್ಯಗಳನ್ನು ಪರಿಗಣಿಸಬೇಕು ಎಂದು ಅವರು ಹೇಳಿದ್ದಾರೆ. ಘಾಟ್ ಪ್ರದೇಶದಲ್ಲಿ ರೈಲುಗಳು ನಿಧಾನಗತಿಯಲ್ಲಿ ಸಂಚರಿಸಿದ ಬಳಿಕ, ಮಂಗಳೂರು ನಗರಕ್ಕೆ ಸೇವೆ ಒದಗಿಸುವ ಉದ್ದೇಶಕ್ಕಾಗಿ ಮತ್ತೆ 2ರಿಂದ 3 ಗಂಟೆಗಳ ಸಮಯವನ್ನು ವ್ಯರ್ಥ ಮಾಡುವುದು ಸೂಕ್ತವಲ್ಲ ಎಂದು ಸಂಸದರು ಹಾಗೂ ಶಾಸಕರು ವಿವಿಧ ಪತ್ರಗಳಲ್ಲಿ ಸ್ಪಷ್ಟವಾಗಿ ತಿಳಿಸಿದ್ದಾರೆ ಎಂದು ಅವರು ಹೇಳಿದ್ದಾರೆ.
